Home > TPLF woyane > ኢታማዦር ሹም ሳሞራ የኑስ የሥልጣን መልቀቂያ አስገቡ

ኢታማዦር ሹም ሳሞራ የኑስ የሥልጣን መልቀቂያ አስገቡ

September 20, 2012

(ዘ-ሐበሻ)የኢፌዴሪ መከላከያ ሠራዊት ኢታማዦር ሹም የሆኑት ጄነራል ሳሞራ የኑስ የሥራ መልቀቂያ ማስገባታቸውን የኢሳት ቴሌቭዥን ዛሬ ዘገበ። አቶ መለስ ዜናዊ ከሌሉ ሳሞራ የኑስ መቆየት አይችሉም እየተባለ በሰፊው ሲነገርላቸው የቆዩት እኚሁ የመከላከያ ሠራዊት ኢታማዦር ሹም ለስልጣን መልቀቂያው ያቀረቡት ምክንያት “በቃኝ! ደከመኝ” የሚል ነው ሲል ኢሳት ምንጮቹን ጠቅሶ ዘግቧል።

መንግስት ሰሞኑን ለጀነራሎች ሹመት ሲሰጥ በሕወሓት ክፍፍል ወቅት ከነስዬ አብርሃ ጋር አብረው ከተባረሩት ጀነራሎች መካከል የአየር ኃይሉ አዛዥ አበበ ተክለሃይማኖት ባለቤትና ለአድዋ ተወላጅ ለሆኑት ለኮለኔል አስካለ ብርሃነ የመጀምሪያዋ ሴት የብርጋዴር ጀነራልነት ሹመት መሰጠቱን ዘ-ሐበሻ ከቀናት በፊት መዘገቧ አይዘነጋም። ከሰሞኑ ለ37 ከፍተኛ የጦር መኮንኖች ሹመት ከተሰጠ በኋላ በመከላከያ ውስጥ ያለው ውጥረት እያየለ ከመምጣቱም በላይ ከነስዬ ጋር አብረው ተባረው የነበሩት ጄነራል ፃድቃን ገ/ትንሳኤ ከራያ ቢራ ፋብሪካ ፕሮጀክት ውጭ በጦሩ ውስጥ ያሉ ደጋፊዎቻቸውን በማሰባሰብ ከፍተኛ የሆነ ምስጢራዊ የማደራጀት ሥራ እየሰሩ መሆኑን በጦር ሰራዊቱ አካባቢ ያሉ የዘ-ሐበሻ ምንጮች ተናግረዋል።

ወትሮም ቢሆን ሰራዊቱን የመምራት ብቃት የሌለው ሳሞራ የኑስ ስልጣኑን ያገኘው የመለስ ቡድን ስላሸነፈና መለስ ስልጣን ላይ ስለነበረ እንደሆነ የሚገልጹት የሕወሓት የውስጥ አዋቂዎች አቶ መለስ ከሞቱ በኋላ “ደከመኝ ወይም በቃኝ” ብለው የስልጣን መልቀቂያ ማስገባታቸው እንደማያስገርም ተናግረዋል።

በከፍተኛ ሕመም ላይ እንዳሉ የሚነገርላቸውና በተከታታይም ወደ ውጭ ሃገር እየወጡ በመመላለስ በመታከም ላይ የሚገኙት ሳሞራ የኑስ የሥራ መልቀቂያ ማስገባታቸውን የዘገበው ኢሳት የሥራ መልቀቂያቸው ተቀባይነት ስለማግኘቱ ግን ያለው ነገር የለም። የዘ-ሐበሻ የቅርብ ምንጮች እንደሚሉት ደግሞ ሳሙራ በተሰናባቹ ጀነራል ጻድቃን ገ/ትንሣኤ የውስጥ ለውስጥ ጣልቃ ገብነት ደስተኛ አይደሉም። ሁሌም የሚያስጨንቃቸው የጻድቃን ጉዳይ ነው ይላሉ።

ከመከላከያ ተሰናብተው የነበሩት የቀድሞው ኢታማዦር ሹም ጀነራል ፃድቃን ገብረትንሣኤና የቀድሞው የአየር ኃይል ዋና አዛዥ አበበ ተክለሃይማኖት በምርጫ 97 ወቅት ሕወሓት ችግር ውስጥ ገብቷል፤ በምርጫ ተሸንፎ ቦታውን ሊያጣ ነው በሚል ተሰባስበው እንደነበር የሚታወስ ነው።

source: www.zehabesha.com

Categories: TPLF woyane
%d bloggers like this: