Home > Archives > ጁነዲን ሳዶ ከኦህዴድ አመራርነት ተባረሩ

ጁነዲን ሳዶ ከኦህዴድ አመራርነት ተባረሩ

October 8, 2012

(ዘ-ሐበሻ) ዘ-ሐበሻ በተደጋጋሚ የኦሕ ዴድ ምንጮቿን ገልጻ ጁነዲን ሳዶ ከኦሕዴድ አመራርነት ከሚንጓለሉት ባለስልጣናት መካከል አንዷ ናት ስትል መቆየቷ ይታወሳል። አሁንም ከኦህዴድ ውስጥ ያሉ የዘ-ሐበሻ ምንጮች እንደገለጹት የሲቪል ሰርቪስ ሚኒስትሩ አቶ ጁነዲን ሳዶ ከኦሮሞ ሕዝቦች ዴሞክራሲያዊ ድርጅት (ኦሕዴድ) ሥራ አስፈጻሚነት ተነስተው በተራ አባልነት እንዲቀጥሉ ተወስኗል።

በአውስትራሊያ ከፍተኛ ተቃውሞ ደርሶባቸው ከተመለሱ በኋላ እዚህ ሚኒሶታ ውስጥ ከኦሮሞና ከሌሎች ብሄር ብሄረሰቦች ጋር ለመወያየት ስብሰባ አዘጋጅተው፤ ከባለቤታቸው እስር በኋላ ከሃገር ውጭ እንዳይወጡ በመታገዳቸው የተነሳ የሚኒሶታው ስብስባ ወጪ ከወጣ በኋላ መታገዱ ይታወሳል።

የኦሕዴድ ሥራ አስፈጻሚ ከመስከረም 21 ቀን እስከ መስከረም 24 ቀን 2005 ዓ.ም. ባካሄደው ዓመታዊ ጉባዔው ላይ፣ በሟች እናታቸው መኖሪያ ላይ እያሠሩት ካለው መስጅድ ጋር በተያያዘ የተገመገሙት ሚኒስትር ጁነዲን፣ ከፍተኛ የዲሲፕሊን ጉድለት መፈጸማቸውንና ካሉበት ኃላፊነትና ሥልጣን አኳያ ተገቢ ያልሆነ ሥራ መሥራታቸው በዋነኝነት እንዳስገመገማቸው የገለጸው ምንጫችን ጉዳያቸውን ከሙስሊሞች እንቅስቃሴ ጋር ለማያያዝና ለማሸማቀቅ እንደተጠቀሙበት ተገልጿል።

እንደምንጩ ዘገባ አቶ ጁነዲን በእናታቸው የኑዛዜ ቃል መሠረት በመኖሪያ ቤታቸው ላይ መስጅድ ለማስገንባት፣ በሚኒስትርነታቸው ሳይሆን በግለሰብ ደረጃ ለመስጅዱ ማስጨረሻ ከሳዑዲ ዓረቢያ ኤምባሲ ዕርዳታ በመጠየቃቸው፣ የመስጅዱ የመጀመሪያ ደረጃ ምርቃት ሲደረግ በኢትዮጵያ የሳዑዲ ዓረቢያ አምባሳደር ተገኝተው 500 ቅዱስ ቁርአንና 50 ሺሕ ብር ዕርዳታ መስጠታቸውን ራሳቸው አቶ ጁነዲን በጻፉት ደብዳቤ ያረጋገጡ ሲሆን ባለቤታቸው አምባሳደሩ የሰጡትን 50 ሺሕ ብር ለመቀበል ኤምባሲ ሄደው ተቀብለው ሲወጡ፣ ለሽብር ተግባር የሚውል ገንዘብ ተቀብለዋል በሚል ተጠርጥረው በቁጥጥር ሥር መዋላቸው መዘገቡ ይታወሳል።

በአዲስ አበባ የሚገኙት እንደነ ሚሚ ስብሃቱ፣ ቢኒያም ከበደ (ኢትዮጵያ ፈርስት) ጁነዲን ሳዶ እንዲታሰሩ መንግስትን በመንግስት ራዲዮ ላይ ሲወተውቱ የነበረ ሲሆን፤ ይህ የሚያሳየውም ጁነዲንን ለማሰናበት ዛሬ እንዳልተወጠነ ነው። ሌሎች የዘ-ሐበሻ ምንጮች እንደሚሉት ደግሞ በኦሕ ዴድ ውስጥ በሙስና እና በስልጣን መባለግ ያልተጨማለቀ ባይኖርም አመራሩ በቡድን ጥገኝነት ተመቷል። የአሪሲ ግሩፕ፣ የወለጋ ግሩፕ…ወዘተ በሚሉም በባለስልጣናቱ መካከል የስልጣን ሽኩቻና መባለግ ጥገኝነት በግልጽ እንደሚታይ የዘ-ሐበሻ ምንጮች ጨምረው ገልጸዋል።

ጁነዲን ሰኞ በሚከፈተው ፓርላማ በአቶ ሃይለማርያም ደሳለኝ የሲቪል ሰርቪስ ሚኒስተርነታቸውን እንደሚነጠቁና በአዲሱ ካቢኔ ውስጥ እንደማይኖሩ፤ ያለመከሰስ መብታቸውም ተነስቶ ሊታሰሩ እንደሚችሉ የዘ-ሀበሻ ምንጮች ጨምረው አረጋግጠዋል።

Source: www.zehabesha.com

Categories: Archives
%d bloggers like this: